Lectio Divina – Biblíuleg íhugun
Námskeið í Lectio Divina verður haldið í safnaðarheimili Lágafellskirkju í Mosfellsbæ helgina 25.-27. ágúst 2023 á vegum Kyrrðarbænasamtakanna á Íslandi.
Föstudagur, 25. ágúst kl. 18:00-21:30
Laugardagur, 26. ágúst kl. 10:00-15:00
Sunnudagur, 27. ágúst kl. 13:00-16:00 (Mosfellskirkja)
Verð: 12.000 kr. (10.000 kr. fyrir öryrkja, eldri borgara og nemendur) innifalið í verðinu er matur báða dagana.
Skráning: https://kyrrdarbaen.skramur.is/input.php?id=10
Nánari upplýsingar: kyrrdarbaen@kyrrdarbaen.is eða í síma 661 7719 (Bylgja Dís).
Námskeiðið hentar þeim sem vilja auðga trúarlíf sitt og þá sérstaklega í tengslum við bæn og lestur ritningarinnar. Námskeiðið hentar jafn byrjendum sem lengra komnum. Mikilvægt er að þátttakendur mæti á námskeiðið sem heild. Aðeins er pláss fyrir 12 þátttakendur.
Lectio Divina á rætur sínar að rekja til aðferðar sem kallast haggadah sem gyðingar, m.a. á tímum Jesú, notuðu til að túlka ritningarnar. Lectio Divina hefur verið iðkuð frá frumkristni en aðferðin hefur varðveist innan veggja klaustranna og tilheyrir hugleiðsluhefð kristinnar trúar. Íhugandi lestur Lectio Divina gengur út á gæði umfram magn og að fara á dýpt textans með opinn huga og opið hjarta. Kjarni Lectio Divina er vinátta við Krist og því er um afar persónulega bænaiðkun að ræða þar sem ritningarversin leggja grundvöll að samtali sem smátt og smátt leiðir til náinnar og innilegrar vináttu.
Auk þess að ástunda Lectio Divina með hefðbundum hætti verður kynnt til leiks hvernig nota má aðferðina á fjölbreyttan hátt.
Leiðbeinendur námskeiðsins eru hjónin Bylgja Dís Gunnarsdóttir og Henning Emil Magnússon. Bylgja Dís starfar sem æskulýðs- og upplýsingarfulltrúi Hafnarfjarðarkirkju og er auk þess nemandi í ritlist við Háskóla Íslands og í andlegri leiðsögn hjá Leadership Transformations Inc. Henning Emil starfar sem prestur í Lágafellsprestakalli en hann er einnig kennaramenntaður og starfaði sem kennari um árabil. Bylgja Dís og Henning Emil hafa á undanförnum árum kynnt sér hugleiðsluhefð kristinnar trúar og iðka úr þeim ranni Kyrrðarbæn, Lectio Divina og Fagnaðarbæn og eru með kennsluréttindi í þessum bænaaðferðum frá Contemplative Outreach Ltd.
